السبت، 30 يناير 2010

معاناه حمار


كائن من ضمن الكائنات ربنا رزقنا بيه لخدمتنا والاستفاده منه وجعلنا نرعاه ونحميه بما يحقق منفعتنا وبردوا رفقا به ولكن احنا طبعا لازم نحسسه بالظلم والقهر في كل حاجه

يخدمنا ويطلع عنيه وبردوا نعذبه ونزله مكأفاه للي بيعمله معانا ومكأفاه لمساعدتنا

مدخلينه في كل حاجه في الزراعه ومع الفلاح بيعتبر الحمار وسيله مواصلاته وعربيه نقله بيشيله كل حاجه وفي الاخخر لمقابل يكون انه يسيبه من غير اكل ولا غطا في البرد ويدخل يدفي وينام هو

هو ده مش كائن بيحس ؟ ولما تيجي تسال حد منهم يقولك يعني انيمه في البيت مكاني هنعمله ايه يعني ماهو متعود !!!!

يشيل ويحط ويروح وييجي وفي الاخر نضربه في الزحمه قال مش عايز يمشي او مش قادر يمشي او يطلع المطلع العالي عليه وفوق قدرته هو في ايه؟

طيب لما تلاقي حمار واقف وفي واحد يجيب دبوس ويشكه بيه في بطنه وده واقف في حاله والتاني المفترض انه ماشي في حاله يبقي ده اسمه ايه؟

في مباراه الجزائر كسبناهم لونا الحمار بعلمهم وفي ناس حرقت العلم علي الحمار فين الاحساس؟؟؟

وكذلك في اي حاجه وغيره وغيره كتير من المواقف اللي كلنا بنشوفها في الشوارع

هو يعني عشان مش قادر يتكلم ويتمرد ويتنكر علي وضعه نعمل اللي احنا عايزينه فيه بدون شعور علي الرغم انك لو نظرت لعين الحمار هتحس فيها بحزن فظيع وظلم واسي يمكن تغير موقفك وتحس بيه

هو احنا ليه كده مش بقي عندنا ادني احساس بالرحمه

ده حتي الرسول صلي الله عليه وسلم وصانا بالرفق بالحيوان بجد مش عارفه اقول ايه

غير ان كل حاجه بقيت بتقابل بالسوء

ترضي لنفسك انك تتعامل كده؟ مانت وهو كائن واحد والفرق العقل بينكم بس الاحساس موجود لو ترضي لنفسك تتعامل بالقسوه دي خليك علي وضعك واوعي تتغير

وربنا يقويك ياادي الحمار علي حالك

الجمعة، 29 يناير 2010

غرائب الشارع


طول ماانت ماشي في الشارع بتقابلك غرائب وطرائف واكيد كل حد فينا اتعرض للمواقف دي او شاف حاجه استغربلها جدا

و ساعات كتير مش بتبقي عارف تعمل ايه وعقبال ماتفكر تتصرف ازاي يكون المشهد خلص وانت بردوا مازالت واقف مندهش تعالوا كده نشوف ايه اللي بيحصل في الشارع

لما تبقي قاعد في ميكروباص وتسمع نغمه موبيل كاكي كاكي كا عادي جدا بس اللي مش عادي انها تبقي لراجل عجوز

لما تشوف بنت ماشيه بتعيط جامد اوي وفجاه تلاقي راجل جيه ونازل ضرب فيها

ولما تلاقي الشارع واقف تماما ولما تحب تعرف السبب تلاقي اتننين ستات ربنا مديهم شويه قوه وبيعملوا استعراض كاراتيه في الشارع مش بس كده وكمان واحده منهم تتجرد من ملابسها والشارع اللي مايشتري يتفرج

لما تلاقي واحد مجنون جيه عض راجل من كتفه وطلع يجري

ياتري ايه اكتر موقف غريب او طريف حصلك في الشارع وعملت فيه ايه ؟

وانا دلوقتي مضطره اقولكم باي باي اصل في واحد مجنون بثق عليا (تف عليا)

السبت، 2 يناير 2010

سرقه بالبيض


كل يوم بنسمع اخبار ومقالب واحداث جديده منها اللي بستغرب منه اوي ومنها اللي بنتصدم لما بنسمعه وفي كمان حاجات بنسمعها مش بنبقي عارفين ده ليه حصل ولو حصل معانا هنعمل ايه

من اخر الحاجات اللي سمعنا عنها طرق جديده في السرقه وهي انك تبقي ماشي كده في امان الله وهوب فجأه تلاقي كرتونه بيض اتحدفت علي عربيتك طبعا انت زي الشاطر كده هتقوم موقف العربيه ونازل تندب حظك جنب العربيه وتفكر تعمل ايه في المصيبه دي لانك لو رشيت ميه وخليت المساحات تقوم بدورها لزاجه البيض مع الميه هتعمل احلي شغل واحب اطمنك انك بردوا مش هتشوف حاجه ولو حبيت تنشفها بحته هتتعك وبردوا ومش هتعرف تشوف حاجه لان الزجاج هيبقي مخيم جدااااا وعقبال كل ده مايحصل هتكون انت وعربيتك اتقلبت قصدي اتسرقت

طيب تخيل بقي كده لو انتي ماشي علي رجليك في الشارع سواء مستعجل او متشيك ورايح مشوار مهم بقي اوي او رايح الشغل وفجأه لقيت بيض ني بيترمي عليك وطبعا اتبهدلت هيكون رد فعلك ايه واحساسك وقتها ايه ؟

وبصراحه لما سالت الناس كان ردهم

مدحت وجدي: هموته

وهكون مخنوق جدا لاني هكون اتبهدلت

ابراهيم: لو كان قصده هموته علي طول اما لو غصب عنه هقوله الله يكرمك وهحاول اتصرف انا بقي

امنيه عبدالله :هيبقي يومه مش فايت وايه القرف ده

شيرين : يييع ده انا ممكن اعيط في الشارع

دينا: انا هزعقله وهعيط علي اللي حصلي

حنان صالح :مش عارفه ممكن اعمل ايه من كتر الصدمه وبعدين دي بتختلف من رجل كبير لشله شبابا لحد معتوهه او ده يعني كل فوله وليها كيال

هبه: يالهوي بس هضايق اوووووي وممكن ازعق جامد

سهر معرفش

امل محمود : هبص بقرف واحتمال اشتم

اما انا بقي فمش عارفه هقول ايه ولا هعمل ايه بس اللي متاكده منه اني هفضل واقفه مصدومه شويه وممكن تلاقوني قولت ينفع كده

ها هتعملوا ايه وهيكون احساسكم ايه ؟

نشر بمجله بحلقه بتاريخ 17 ديسمبر2009

إحساسك إيه لو جه لك زهايمر ؟

الذاكره من نعم الله علينا التي لا تعد ولا تحصي طبعا نعمه وفضل كبير جدااااااا منه علينا شوفوا احنا من غيرها كانت حياتنا هتبقي عامله ازاي مش بس كده ده احنا من غير ذاكره مفيش دماغ مفيش تفكير مفيش اي حاجه خالص لانك ببساطه مش هتبقي فاكر اي حاجه علشان تعمل اي حاجه

بس علي الرغم من كده النسيان نعمه علينا ولكن مش لدرجه انك تفقد ذاكرتك لان بردوا لو كنت بتنسي مكنتش هتقدر تعيش من كميه الضغوط ولا هتقدر تفكر فهي سلاح ذو حدين ده انت لما بتنسي اسم زميلك بتبقي مضايق اوي انك اتحرجت قدامه ولما بتنسي رقم مهم بتبقي مش طايق نفسك وياسلام بقي لو نسيت حاجه مهمه قدام مديرك وغيره كتير من المواقف اللي ممكن تتحط فيها تبقي عارف يعني ايه توصل لدرجه انك تنسي اسم ابنك ومواعيد رضاعته وتغيير حفظاته والكلام ده وتتضطر انك تكتبي ده كله علشان تقدري تتجاوبي امشي بقي بورقه وقلم علي طول الوقت ،

ايوه ده فعلا حصل لإمراه بريطانيه متستغربوش اكيد محدش نفسه يبقي في نفس الحاله دي وعلشان كده جبتلكم انهارده بعض الاكلات البسيطه اللي هتساعدنا في تقويه الذاكره اولا الاسماك بتلعب دور كبير جدا في تنشيط الذاكره

ثانيا تناول الفاكهه وخاصه التي تحتوي علي فيتامين أ ج د مثل الفراوله والتوت والكريز والبرقوق ولانها بتعمل علي التخلص من المواد المؤكسده الضاره بخلايا المخ

ثالثا عليك تجنب الاطعمه التي تحتوي علي الدهون المشبعه كاللحوم الحمراء والالبان كامله الدسم‏،‏ والمقليات والسكريات والعجائنكمان عايزه اقولكم ان الاهتمام بنظافه الاسنان واللثه بيلعب دور كبير جدا في تقويه الذاكرهعمرك فكرت في احساسك لو فقدت الذاكره ؟

اكيد انت دلؤقتي مستغرب من سؤالي بس انا متاكده انك مسالتش نفسك احساسك هيكون ايه ؟ياتري هيكون ايه؟تعالوا كده نشوف احساس بعض الناس هيكون ايه

ساره عزو : هكون حاسه بالبله لاني مش هكون فاهمه حاجه حواليا وحاسه ان الناس كلها غلط وانا اللي صح

احمد جمال: اكيد هكون زعلان لاني مش هكون قادر اعيش وفي نفس الوقت احيانا هيكون كويس عشان اقدر انسي الحاجات اللي نفسي انساها

حاتم عرفه:اكيد مش هابقي فاكر امل محمود: اكيد مش هبقي حاسه حاجه لاني مش هابقي فاكره

محمد سعيد : هزعل علي الحاجات الجميلة اللي هنساها و هفرح علشان هنسي كل الوحش

مصطفي سعيد:مش هاعرف اني عندي زهايمر وقتها

بردوا مقولتليش احساسك هيكون ايه؟

نشرت بمجله بحلقه بتاريخ 26 نوفمبر 2009

ياتري حلمك race ولا عربيه؟


كل يوم بيعدي علينا بنكبر واحلامنا وطموحاتنا بتكبر معانا

وفي ظل كل الازمات اللي موجوده في بلادنا واللي المواصلات واحده منها بقي حلم حياه كل شاب انه يكون معاه عربيه ومش مهم بقي اي حاجه تانية المهم انه يكون معاه عربيه وبس.

اتجدد الحلم ده واتغير وبقي امنيه حياه معظم الشباب انه يجيب ال" race " والحقيقه انه بقي حلم البنات والولاد منهم عايز يتمنظر بيه قدام البنات، ومنهم عايز يوصل للمكان اللي عايزه بسرعه الي حد ما .

وعلي الرغم من خطورته الشديده في الطريق ان ده لا يمثل اي عائق بالنسبه لحلمهم مبررين ده ان الاعمار بيد الله واللي نصيبه في حاجه هيشوفها

واختلفت الاراء بينهم

تعالوا كده نتعرف علي رأيهم وسبب حبهم الشديد ليه

احمد علي 19 سنه : شكله جامد بس مش هشتريه لاني عندي عربيه وكمان خطر جدا

احمد جمال 20 سنه:انا مش عارف ده ايه لزمته في الحياه غير ان الواحد بيستعرض دي حتي القاعده عليه مسخره!

مصطفي سعيد 15 سنه: شكله جامد وسرعته عاليه وبيدي منظر رهييييب ده غير ان حاجه بعجلتين وبتوصلني للمكان اللي عايزه

محمد سعيد 20 سنه:سريع وبينجز وبيعدي في الزحمه وثمنه حلو

اما عن رأى امنيه فتحي فهي تحبه وعايزه تشتري واحد

وعلي الرغم من ذلك معظم الاهالي يرفضونه خوفا علي ابنائهم من خطورته

وكانت معظم الاراء بالنسبه للبنات مش هبص لواحد بيتمنظر بيه لانهم مش بيحبوا المنظره ياتري ده بجد ولا كلام من ورا قلبهم؟

في العربيه في هيكل بيحميك انما مع ال race الشارع بيقولك اهلا وسهلا بيك وكله

ياتري حلمك موتوسيكل (ريس) ولا عربيه وليييييه ؟

يلا قولنا حابين نسمعك

نشرت بمجله بحلقه بتاريخ6 نوفمبر 2009

امتي اصغر بقي ؟


يوووه ياماما بقه تعالي الحقيني اخويا عمال يضربي

امتي بقي اكبر وافرمك

يووه هو كل حاجه انا انا امتي بقي اكبر علشان ابقي مشغول واقدر اقول لا

انا عايز اكبر وابقي ظابط علشان امسك الحرامي

وانا عايز اكبر ابقي مدرس واضرب العيال زي مامدرستي بتعمل فيه

؟

نفسي اكبر بقي قولناها كتير وبنسمعها كتير في عالم الطفوله الغريب والطريف

ولما كبرنا اتعكس الامر وعايزين نصغر تاني ياتري ليييييييه

حنينا لايام زمان ؟ والزهقنا من جو الكبار اللي عايشين فيه؟

تعالوا نشوف اصحابنا كانوا بيعملوا ايه؟

كنت بعوم في النيل مع اصحابي

بلعب في الشارع ده شئ اساسي بنعمل البدع

كنت بلعب بلي مع اصحابي

كنت بطير مع الطياره واعد اجري وراها

افلام الكارتون ياسلام عليها

كنت ببيع الساندوتشات بتاعتي في المدرسه ده شكله معذور في قرشين ولاحاجه

ياسلام بقي علي العربيات وفوووووو والمسدسات

كنت بديها تكسير في اللعب

كنت بضرب اختي براحتي ماانا صغير بقي

كنت بعوم الشقه ميه من ورا ماما واقول شط اسكندريه

بنوته"نفسي العب كوره اوي"

كنت بحط ايدي في بؤ الكلب !!!!!

كنت بطير العصافير من القفس بتاعها

مره لقيت صرصار في المدرسه وحطيطه في علبه واعدت اخوف بيها البنات

ياااااا لو ترجع ايام زمان

تخيل نفسك في رحله زمنيه لمده 5 دقائق بغرائب الطفوله ياتري هتعمل فيهم ايييييييه

نشرت في مجله بحلقه بتاريخ 27 اكتوبر 2009