الاثنين، 16 يونيو 2008

الاحساس

الصوره دي قمه الاحساس بالنسبه ليه
الاحساس ده اجمل حاجه في الدنيا انك تحس بأن في حد او حاجه بتحس بيك
اكيد هترتاح لما يوصلك ده من اي حد مهما كان لو حتي من عصفور صغير
الاحساس مهم اوي في كل حاجه

الاحساس بين الحبيبن حلو اوي لما تتكلم مع حبيبك وهو فاهمك
بس الاجمل انك تتكلم معاه وهو حاسك
الكلام هيوصل قبل ميخرج اصلا

الاحساس مهم اوي بين الام واولادها
لازم هتحس بيهم هتقف جنبهم
معاهم في مشاكلهم ايوه لازم يكون موجود الاحساس ده

الاحساس بين الاصدقاء ان في واجب عليه
ان صاحبي ده اخويا صحبي ده حته مني
في لينك مشاعر واصل بينكم جميل اوي ده

الاحساس بين الاخوات احساس الاخوه شئ جميل جدا
كل حاجه في حياتنا في احساس بتبقه احلي

الصوره لو فيها احساس هتوصل علي طول
بل بالعكس الصوره بتعكس الاحساس وبتوصل الفكره

ولكن ازاي تقدر توصل احساسك ده ومش بس كده وتوصله صح كمان
وياتري هتقدر تتكلم مع حد مش حاسك
وهتعرف منين انه مش حاسك
وانت ازاي بتوصل احساسك هل بالكلام؟ بنظره؟ بلمسه؟

انا تايهه


بصراحه كده انا مش عارفه ابدا منين ولا اقول ايه
بس اناجوايا حاجات كتير اوي وكلها متلغبطه علي بعض
او كل مظبط اموري وارتب نفسي ارجع تاني الاقي نفسي متلغبطه
باختصار كده انا تايهه مع نفسي وليه هدف عايزه اوصله ومش قادره اوصله
وده ايلي هيجنني مش عارفه بجد
انا اه لسه في بدايه الطريق 18 سنه مش حاجه يعني بس بردوا
انا عندي طاقه حاسه انها هتفجرني انا قبل مفجرها

نفسي اوي اكتب والاقي مكان بجد يوظف الموهبه دي صح
يساعدني بجد يقولي انا هنفع ولا لا
ولو هنفع طريقي فين
محتاجه مساعده بس عايزاها من بره مش من القرايب
اصلا خلينا نتكلم بصراحه مفيش مساعده هتيجي من جوه البيت لانهم خايفين عليه
ولا موافقين بصحافه ولا حتي اذاعه ولا اي حاجه
وانا واخده الموضوع عند بعند
بس بجد انا عايزه احدد لنفسي اذاعه ولاصحافه انا حاسه نفسي في الاتنين
الاتنين بيكملوا بعض
عايزه وعايزه وعايزه ومش عارفه بردوا
المهم باختصار كده انا تايهه بجد مش عارفه اعمل ايه ولا احدد ولا اروح فين
ولا قادره حتي افكر اكتب حاجه جديده
كل حاجه وقفت فجاه
في الاخر بردوا هقول مش عارفه ياريت بجد اعرف والاقي حد يساعدني اعرف اوصل
يارب ساعدني

الأحد، 8 يونيو 2008

سحر الصوره


الصوره دي عجبتني جدااااااا ولمستني اووووووووي
انا بحب ركوب الخيل جدا واول مره جربتها فيه انا فاكره كنا في رحله للهرم وركبت حصان وكنت خايفه اوي
وعجبني اوي الموضوع بعد كده وفضلت اركبه لحد منتهت الرحله يمكن معملتش حاجه غير ركوبي الحصان ده
الحصان ده بيمثلي في عيونه الجمال
في جسمه الهيبه
في حركته النشاط
كلو علي بعضه يجنن ملوش زي
انا هوايتي الرسم لما شوفت الصوره دي اتجننت وقولت فعلا لازم اقوي الرسم بتاعي انا عندي الموهبه
الصوره دي بجد عجبتني وجننتني

الخميس، 5 يونيو 2008

اتكلم مع الطفل

كل واحد فينا ليه اكيد حد قريب منه وبيحب يتكلم معاه
وبيحكيله همومه ويشاركه افراحه واحزانه
واكيد طبعا بيكون من نفس سنه او حتي حد يفهمه ويحس بيه

طب ياتري حد فيكم فكر يكلم طفل صغير ويحكيله عن كل حاجه عنه
يعد كده يكلمه كانه حد كبير قودامه ويتابع الطفل ده هيعمل ايه
عارفين هتلاقوا ايه
الطفل ده هيعد يلاغيك كده وهتحس انه فاهمك ممكن يضحك لو فيه حاجه مفرحاك ويعيط لو في حاجه مزعلاك
كفايه انك هتعد تتكلم مع براءه ملهاش حدوووووود
اكيد هتخرج من ايلي مدايقك وهتبقه تمام اوووووووي
بجد الاطفال نعمه والتعامل معاهم اكبر متعه

دايما حبيبي

علي بالي وفي خيالي
دايما ياحبيبي شاغلي بالي
في احلامي وفي منامي
دايما ياحبيبي منورهالي
دايما ياحبيبي معايا وجوايا
ومالكني هواك
وانا دايما بدعي ربنا اكون معاااااااااااك

دردشه علي الميل

كل واحد فينا اكيد في حاجه مبيحبش يعملها ابداااااا
ولو عملها بتبقه بمثابه اعدام ليه
ومن هنا قررت محكمه احلي كلام بمعاقبه الجناه الذين لا يطيقون الدردشه علي الميل
بالجلوس لعدد ساعات محدد علي الميل
وعمل دردشه وقد تصل المده الي 3 ايام وهو بمثابه اعدام لديهم
معلش بقه يستحملوهم في حين ان غيرهم بيحقد عليهم من العقاب ده لحبه الشديد في الدردشه