الثلاثاء، 1 يوليو 2008

بتتحكم ليه؟


بتتحكم ليه؟
سؤال ومحيرني وحاوت اعرف اجابته من بعض الشباب
السؤال هو ليه الولد بيحب يتحكم في البنت
سواء اذا كانت اخته او حبيبته
كنت بعد افكر واكلم نفسي ليه الخنقه دي يعني
هل يعني بيحس برجولته لما يقوم ويزعق ويعمل فيها السبع رجاله
ولا لما بيمد ايديه عليها
ولا لما يمنعها من حاجه نفسها تحققها
الموضوع كبير اوي وليه حاجات كتير ودوافع كتير
بس انا سالت مجموعه من الشباب وكان ضمن سؤالي
انت بتتحكم ولو ليك اخت هتتحكم؟ وايه الحل من وجهه نظرك؟
ودي كانت الاجابات
مصطفي السيد تفتكر ايه سبب التحكم؟
ملوش شرط بمعني انه مش شرط يكون في تحكم بس اذا كان موجود
بيبقي علشان بيحبها اوي او بمعني تاني بيغير عليها وبيظن ان كده هتفلت منه
واخدين بالكوا قال ايه بيظن
؟
يعني معني كده انها هتفلت منه
طبعا لان التحكم بيجيب الملل والاحساس بسلب الحريه
بتتحكم في اختك؟ لا مبتوصلش لدرجه التحكم بس احيانا بيحصل لان انا الكبير وده بيقتضي احساس بالمسؤليه اني اصدر قرارات تحكميه
والحل من وجهه نظرك؟ عدم التحكم

حسام اسامه
كان رائيه ان الولد دايما بيحس انه احسن من البنت وانه عنده امكانيات اكتر منها وكمان بيقول ان احساس عند كل الاولاد بالمسؤليه تجاهها والخوف عليها وكذلك اختي بردوا
والحل هو الثقه المتبادله

مصطفي سعيد
كان ليه راي بيقول ان الولد اقوي من البنت وده بيديله المسؤليه وهو ده السبب في التحكم
وكمان الحمايه بتؤدي الي التحكم
طب الحل ايه ؟
الحل ايه بس لو فقدنا التحكم الدنيا كلها هتبوظ اصل البنات شويه مرروشه
وبعدين التحكم للمصلحه يعني مثلا لما اقولها متتاخريش بليل ده لانها مش هتقدر تحمي نفسها لحشاش او خمرجي انما الولد هيقدر يدافع عن نفسه
ولو معملناش كده الدنيا كلها هتبوظ

محمد الرخاوي قال رائي وعجبني اوي
بصراحة مش عارف ايه السبب ... اعتقد ان ده من الاشياء الموروثه الخاطئة عندنا .. لأن اللى يفهم صح هو مش تحكم و لكن نوع من التنظيم و الحماية للبنت فى نفس الوقت .. فاهمين غلط ... فالولد بيتحكم من أجل التحكم و البنت بتاخد أى تصرف منه على انه تحكم ...بالنسبة ليه أنا ماليش اخوات بنات عشان أحكم على نفسى .. و مش مرتبط لسه .. بس متهيألى انى مش من النوع ده .. أو على الأقل .. لو حصل واتحكمت و حد نبهنى .. عندى الحمد لله الشجاعة انى أرجع فيه ...هى القصة كلها لما ربنا قال الرجال قوامون على النساء ... الناس مكملتش الآية .. بما فضل بعضهم على بعض و بما انفقوا ...يعنى زى ما احنا بنقول المركب ما ينفعش يبقى ليها ريسين .. و بما أن الرجل هو النوع الأقوى بدنيا و هو ايللى بيحكم عقله أكثر من مشاعره و هو ايللى بينفق .. فالله أعطاه القوامة ... بمعنى القيادة من اجل المصلحة .. لكن مش من أجل اذلال النساء و التضييق عليهم و نخنقهم .. لأ ... ليهم حقوق لازم ياخدوها .. و الراجل مثلا اذا كان لا ينفق على أهل بيته .. فأعتقد انه بنص الآية تسقط عنه القوامة .. بس ده اجتهاد منى .. لازم يؤخذ فيها رأى علماء ...المشكلة هنا هى نفس المشكلة اللى أنا اتكلمت فيها فى آخر موضوع ليه على البلوج بتاعى أو مرتبطه بيه ارتباط وثيق جدا ... وهى ان كل واحد بيدور على ايللى ليه قبل ما بيدور على ايللى عليه .. و لما تقولى لحد ايللى عليك كذا .. بيتكاسل و ما بيعملش حاجة و ممكن يثور عليكى و يبهدلك و يطلع فيكى العبر كلها ...ولكم فى رسول الله أسوة حسنة ... لم يكن عليه الصلاة و السلام يتحكم فى نساءه و هو رسول الله ... بل كان يستمع لهم و يناقشهم و يلاعبهم ... كان يسابق السيدة عائشة رضى الله عنها .. و فى مرة سبقته ... فظل فترة يغذى فيها حتى زاد وزنها ... ثم سابقها هذه المرة فسبقها ... فقال لها هذه بتلك ... من مننا يفعل ذلك ؟؟ ... و الله لو خلينا ده مرجعنا .. هنبقى كويسين قوى
لقيت بنت قودام قولت اسالها يمكن اكون انا مزوده الموضوع حبتين
ولقيت رحاب لقيتها بتقولي البنت ده ممكن يحصل قودامها وممكن انها تقبله بس ممكن بردوا متقبلوش
وقاليتلي ان الحب اعمي في بيقبلوا بالتحكم ده لانهم بيحبوا
ولكن هي رائيها نكون اصحاب احسن وكل واحد يقول رائيه واذا اتفقوا خلاص اوك لو متفقوش بقه؟؟؟؟؟؟
تحاول لاما تقنعه او يقنعها محصلش خلاص
ملوش لازمه الضغط
اصل في ناس بتقول الولاد عندهم معرفه اكتر مننا ولكن البنت ممكن دماغها تبقي بميت راجل وتحكمات الولاد بتبقه كتيره اوي
متخرجيش ومتلبسيش وبيغيروا عليهم اوي

بصوا بقه انا مش محتاره ولا حاجه ولا هقول للولد لا متتحكمش
لانه لازم يحس بنفسه ولازم يحس برجولته وكل حاجه وانا مش بقول ان البنت تلغي شخصيته خالص
وهو كمان مينفعش يلغي الشخصيه
انا بس نفسي ايلي يحصل انه يتحكم بس باسلوب راقي اوي
موضوع نقاش ويقنعها بوجهه نظره سواء اذا كانت اخته او حبيبته

يحتويها صح يبينلها ان ده خوف عليها وانه بيحبها اوي
وان ده علشان مصلحتها ويقنعها بده ويحسسهولها
صدقوتي لو ده حصل هي غير انها هتبقه مقتنعه او مش مقتنعه هتبقي عايزه تعمل كل حاه علشان ترضيه وخاصه طبعا لو حبيبها
ده مش علشان الحب اعمي بس الواحد عامه لما بيحس ويلاقي ان في حد قودامه بيحبه اوي وبيخاف عليه وهامه مصلحته بيبقه عايز يعمل كل حاجه علشانه


هناك 8 تعليقات:

Mohamed El Rakhawy يقول...

حلو أوى الموضوع يا هوبة ... و عجبنى أوى اسلوب ان انتى جمعتى آراء و عرضتيها و فى الآخر قولتى رأيك ... ريبورتاج و لا أجدع صحفى ... ما شاء الله لآ قوة الا بالله ... وعجبتنى الصورة جدا جدا جدا .. ملهاش حل بصراحة ... بس انتى ما قولتيليش انك هتعملى كده .. كنت ضبطت السبلينج .. ده أنا كاتب بأخطاء كتيرة أوى و انتى نسختيها من غير ايديت و لا أى حاجة :):):)

أنا مش متفق مع كل رأيك بصراحة .. ايه لازم يحس بنفسه و يحس برجولته ده؟؟؟ ... هو يعنى ما يحسش برجولته الا اذا اتحكم فى ست ؟؟؟ ما يتشطر على الرجالة اللى زيه ... منطق التحكم ده أنا رافضه أصلا .. العلاقة لازم تخرج من نطاق التحكم الى نطاق التكامل .. احنا دينا دين تكامل .. يعنى كل واحد فينا ليه دور ... ربنا خلق الرجل لصنع الحياة .. و خلق المرأة لكى تخلق الرجل الذى يصنع الحياة ... يعنى اللى ربته امرأة ... طب بتتحكم فيها دلوقتى ليه .. لازم يبقى فيه تفاهم و اقناع زى ما انتى بتقولى بأسلوب راقى مهذب و مراعاة لمشاعرها.. لأن أبسط شىء القهر هيولد عصيان و عدم ادراك المرأة لسبب القهر ده .. هيخليها تتصرف تصرفات لا تحمد عقباها .. لكن لو انت اقنعتها .. أصبح الوضع مختلف .. بقى القرار قرارها .. و بقت هى واخده بالها من اللى أنت خايف منه .. و بالتالى هتتصرف فى غيابك أحسن من فى وجودك ... بس ده طبعا يتطلب ان المرأة كمان تكون عاقلة ... يعنى ما تبقاش واحدة طايشة .. فى الحالة ده لآزم تفهمها برده .. بس القيود لازم تبقى أكتر شوية و برده لمصلحتها مش عشان تحس برجولتك ...

hoba.a7la klaam يقول...

يارخاوي انا مبسوطه اوي بكلامك وبردك علي الموضوع وانك اول واحد كمان
يارخاوي انا بستغرب من التحكم ده مش قصدي انه كده يبقي رجولته اكتملت
بالعكس انا ضد ده خالص
وعجبني اوي كلامك يارب الشباب يعملوا بيه ويفهموه

عبدالله يقول...

بجد الله ينور عليك يا رخاوى انا معاك فى الكلام الى انت قولته كله ... ومتفق معاك فى الرأى
لازم كل واحد يحكم عقله الاول ويفكر قبل ما يتصرف التصرف الى فى دماغه ويجى يعمل ابو الرجاله على الشخص الى ادامه
لازم كل واحد يتحكم فى عقله الاول

غير معرف يقول...

ESshta 3leky ya h0baz enk aklmty 3an al modo3 da:D...w ana motfka m3 r5awy gedn b3d klamo bsra7a mfeesh klam yt2al msa 3a2lk kbeera.. bas ana bshof wlad kteer btet7km 3mal 3la btal mtfhmeesh y3ny eh da!!! momkn tsmeha tnaka masalan!!!..rbna y32lhom isa 3shan al t7akom da 7aga s3ba...t5yly lw bnt at7kmt f walad hyb2a 3aml ezay!!!..Nada

hoba.a7la klaam يقول...

شكرا اوي ياعبدالله وندي علي مروركم وردودكم
بس ياندي انامش بعتبرها تناكه ده بيبقه نقص وعايز يكمله مهو معناها ايه غير كده
او خوف وحب وغيره زايدين ومش عارف يصرفهم صح فبيضطر انه يوظفهم بالتحكم البشع ده
مهو من حق كل ولد انه يتحكم بس بالاسلوب المناسب ايلي ميوصلش انه يخنق

Mohamed El Rakhawy يقول...

يا جماعة مش عاوزين ننسى نشكر هوبة انها فتحت الموضوع ده .. ده فى حد ذاته شجاعة منها جامدة جدا ما شاء الله .. اللهم ثبتها .. و كمان اسلوب العرض ولا اجدع صحفى ...و أصلا مواضيع البلوج كلها ملهاش حل .. ما شاء الله عليها ... يا ريت كلنا نتعلم منها الرقى ده ... و اللهم اجعل الموضوع ده فى ميزان حسناتها .. آميييييين ...
أن يهدى بك الله نفسا خير لك من حمر النعم

hoba.a7la klaam يقول...

ربنا يتقبل منك يارب يارخاوي

the phoenix يقول...

ازيك يا هوبا موضوعك هايل مع اني شايف ان موضوع تحكم الولد في البنت بقي ماضي مش موجود دلوقتي الا نادر اوي والولد اللي بيتحكم كدة بشدة سوري يعني يبقي هو من جواه عنده عقدة نقص وبيحاول يعمل راجل علي بنت وبرده لازم برده تسمع كلامه طالما بيحيوا يعض او اخوات او اصحاب بس تسمع كلامة كنصيحة مش تحكم
موضوع هايل